4 خطوات للهجرة الى استراليا وظيفة مطلوبة + لغة + معادلة + تجميع نقاط

4 خطوات للهجرة الى استراليا وظيفه مطلوبه + لغه + معادله + تجميع نقاط

الهجرة الى استراليا

عايز تهاجر استراليا باي طريقه ؟؟ يبقي تابع المقال دة واعمله save واقراه كويس

موضوع الهجره لاستراليا متشعب جدا جدا جدا
ولا مقال .. ولا الف مقال هيكفيه

لكن هحاول اركز ف المقال دة على اهم النقط وكيف  تبدأ؟
------------------------------------------------------------
هجره استراليا بنظام النقاط ..

تحاول ان تجمع نقاط لكي تصل الى الحد الادنى من النقاط لكي تستطيع الهجرة

زي الجمعيه عند المصريين كدة تجمع القرش علي القرش عشان في اخر الشهر تجمع مبلغ وتقبض الجمعيه
.

كذلك الامر هجره استراليا كدة بالظبط بس بدل فلوس الجمعيه بتكون نقاط .. بتفضل تجمع النقطه علي النقطه لغايه لما يبقي معاك اكبر عدد من النقط اللي يسمحلك انك تهاجر
------------------------------------------------------------

4 خطوات للهجرة الى استراليا :

1- يكون وظيفتك ومهنتك اللي بتشتغلها في مصراو في بلدك مطلوبه اصلا هناك في استراليا
2 - تجمع الحد الادني من النقط عشان تفتح ملف علي موقع الهجره
3- تمتحن ايلتس عشان تثبت ان لغتك الانجلش قويه
4 - تعادل شهادتك المصرية او بلدك لغير المصريين عشان تعرف تشتغل بيها في استراليا

يعني هما 4 خطوات ( وظيفه مطلوبه + لغه + معادله + تجميع نقط )
----------------------------------------------------------------------

طيب ايه المطلوب واحسب النقط بتاعتي ازاي وايه اقل حد من النقط عشان اهاجر ؟؟

1- لازم تكون مهنتك من المهن المطلوبة في استراليا

طب وانا بعرف مهنتي مطلوبه منين يعني ؟؟

بتدخل على المقال ده وتشوف اخر تحديث للوظائف والمهن والحرف المطلوبة

 قائمة بالمهن المطلوبة للعمل والحصول على تأشيرات استراليا تحديث 2018 ....هجرة اونلاين

دي احدث قوائم المهن المطلوبه بتاريخ 1 يوليو 2018
.

وقوائم الوظائف اتعدلوا ل قائمتين :

the Medium and Long-term Strategic Skills List .. MLTSSL
the Short-term Skilled Occupation List ... STSOL

-------------------------------------------------------------------

طيب مهنتي مطلوبه وكله زي الفل .. اعمل ايه بقي ؟

تبدا تعرف تقسيمه النقط عشان تحسب انت هتجيب كام نقطه

عشان تعرف تحسب النقط بتاعتك ادخل علي الموقع دة
https://www.migration.tas.gov.au/points_calculator
.

لكن انا هكتبهملك بالعربي عشان عارف ما حد هيتعب نفسه يدخل يشوف المصدر الرسمي .. بس ما علينا
.

1- نقاط السن :

لو سنك اقل من 24 تاخد 25 نقطة

لو سنك من 25-32 تاخد 30 نقطة
لو سنك من 33-39 تاخد 25 نقطة
لو سنك من 40-44 تاخد 15 نقطة
لو سنك اكبر من 44 تاخد صفر نقطة بشرط متعديش 50 سنه
.

3- نقاط الشهادات والمؤهلات العلمية :

بكالوريوس او اي شهادة اعلي منها واقل من الدكتوراه تاخد 15 نقطه

يعني لو بكالوريوس او ماجستير تاخد 15 نقطه
لكن لو معاك دكتوراه تاخد 20 نقطه
لو معاك دبلوم تاخد 10 نقط
.

وهما بياخدوا اعلي شهادة ليك يعني لو معاك ماحستير ودكتوراه هياخدوا نقط الدكتوراه بس

ولازم تعادلها لانها غير معترفه بيها في استراليا والمعادلة بتكون اما تقييم او امتحان ودي بتفرق على حسب الوظيفة بتاعتك
.

المعادله اسمها skill assessment ودي معادله تقييم للمهارات ومش اكاديمك بس زي بتاعه كندا يعني مش بس هتقيم للمؤهل لا كمان ل سنوات الخبره او امتحانات بتعملها الخ
.

طيب اعادلها منين وايه التفصاصيل بتاعه المعادله ؟؟

في 10 جهات تعادل وتقييم فيهم مهنتك بتقدر تعرفهم من الموقع دة

https://www.border.gov.au/…/Skills-assessment-and-assessing…
.

طب افرض انا بشتغل في حاجه تانيه غير اللي درستها !!
يعني انا خريج طب اسنان لكن بشتغل عجلاتي اعمل ايه ساعتها ؟؟ واقيم الشهادة ازاي ؟؟
.

عادي، تقييم المؤهل لازم كده كده يتعمل عشان مش هتعرف تعمل بروفيل من غيره. الوظيفه بقي انت بتقدم علي النوك اللي ليك خبره فيه بغض النظر عن المؤهل

يعني المؤهل بيتقيم وتاخد عليه نقط حسب هما حسبوه كام سنه، بالنسبه للوظيفه بتقدم علي نوك وظيفتك وتجيب شهادة خبره تاخد عليها نقط حسب كام سنه
.

ولكن ولكن ولكن ولكن عشان محدش ينصب عليك ويعملك البحر طحينه
استراليا بالذات لو التقييم للشهادة بعيد عن مؤهلك الاصلي اللي انت اتخرجت بيه بيقلل من نقطك جامد عكس كندا

.

3- نقاط سنوات الخبرة :

لو خبرتك 3 سنين تاخد 5 نقط

لو 5 ل 7 سنين تاخد 10 نقط
لو 8 سنين تاخد 15 نقطة
لو من 8 ل 10 سنين تاخد 20 نقطة

.

4- نقاط اللغة :

الامتحانات المعترف بيها في استراليا يأما ايلتس او بي تي اي

استراليا اقل اسكور بتقبله للايلتس 6666 في كل فرع مش توتال .. لو جبتهم مبتخدش ولا نقطه
لو جبت 7777 في كل فرع بتاخد 10 نقاط
لو جبت 8888 في كل فرع بتاخد 20 نقطة

.

5- نقاط المرافق او الشريك

المتقدم الاساسي بياخد 5 نقط من الشريك لو الشريك وظيفته موجودة مع المتقدم الاساسي فى نفس القائمة ويقيم شهاداته زيه بالظبط
ويكون الحد الادني من الايلتس هو 6666 ويسافر معاك
.

عشان تهاجر استراليا للعماله المهره عندك 3 انواع فيزا هما 190 و189 و489
اختيارك لنوع الفيزا بيديك نقاط
فيزا 189 مش هتاخد منها ولانقطة
فيزا 190 محتاجة ترشيح ولاية فعشان كدة بتديك 5 نقط
فيزا 489 بتديك 10 نقط
.

لو حسبت كل النقط دي ولقيت نفسك مجمع 60 نقطة تقدر تفتح بروفايل علي موقع الهجره وتهاجر
دة الارضي بتاع اي مهنه باستثناء المحاسبه الارضي بتاعها 65 وساعات 70 حسب العرض والطلب
-----------------------------------------------------------------

طب هي التكلفه شاكب راكب كام ؟؟
لو فرد لوحدة بطوله من 100 ل 120 الف جنيه
لو فرد و زوجته و طفلين حوالي 250 الف جنيه
ودول بدون اي وسيط او مكتب سمسره انت بتدفعهم اصلا لاداره الهجره والخارجيه الاستراليه

----------------------------------------------------------------
طب انا دفعت كل دة وامتحنت انجلش ونيله و عادلت شهادة و زفت .. و خلاص خدت الفيزا وسافرت
هروح هناك هلاقي شغل ؟؟

بص انت في استراليا عكس كندا .. في استراليا انت بتكون عامل معادله يعني تقدر تروح تشتغل فورا في مهنتك ولكن ولكن ولكن ولكن في عقبه كبيره هتقابلك الي اسمها  local experience

ان صاحب العمل الاسترالي هيفضل انه يجيب حد عنده خبره في البلد احسن من اللي لسه جاي جديد وبطيخ في نظام البلد ونظام الشغل
.

وساعتها انت عشان تفهم البلد ف الاول بتشتغل حاجه اسمها survival jobs اللي هي اوبر - كاشير - كول سنتر - مطعم وهكذا عشان تكفي مصاريفك وتظبط وضعك في اول 6 شهور
.

طيب برضو معرفتش بعد ال 6 شهور هعمل ايه ؟

هتبدا تعرض نفسك علي الشركات ف التخصص بتاعك باقل اقل اقل الاسعار عشان تاخدهم كوبري فقط انه يبقي معاك local experience في مجالك وبعدين بعد ما تبقي خبره تبدا تفرض شروطك عليهم
---------------------------------------------------------------
طيب يا سيدي انا عملت كل دة ونقطي كامله و وظيفتي مطلوبه وكله ميت فل واربعتاشر اعمل ايه بقي ؟؟
.

هيكون خلصت المرحله الاولي وتدخل علي ليفل الوحش بقي

المرحله ال بعد كدة شرحها يطول وعايز مقال كامل بس هحاول اكتبلك اهم الخطوات

هتعمل 4 خطوات كمان :
.

1- خطوة expression of interest اللي هي EOI

وده انت بتعمله اون لاين على موقع الهجره في الفيزا اللي انت اختارتها عشان الحكومه الاستراليه تبعتلك دعوة

والمدة اللي هتنتظرها عشان تاخد الدعوة بتكون حسب انت مكمل نقطك ولا مش مكملها وحسب نقطك قد ايه

ودي عايزة شرح طويل اوي هنبقي نشرحها في بوست لوحده
.

2- بترفع كل الورق بعد ما تكون ظبطه بكل الصيغ اللي هما محددينها و وثقته فى EOI
.

3- خطوة مراجعه اوراقك كامله من الCase officer المسؤل عنك عشان لو في حاجه ناقصه تعملها
.

4- تعمل الكشف الطبى والفيش وتاخد الجرانت بعديها

الكشف بتعمله في مستشفيات هما محددينها
والفيش لازم تعمله من اى دوله قعدت فيها اكتر من 6 شهور وبيكون صالح لمده سنه
وبعد كدة يبقي معاك الجرانت والفيزا والاقامه الدائمه لمدة 5 سنين في استراليا

.

اسئله سريعه

1- في هجره لاستراليا من غير لغه ؟ مفيش

2- مينفعش اعمل معادله لما اروح هناك واسافر ؟ مينفعش لازم تعملها من مصر

3- ينفع اهاجر وانا صفر خبره ولسه متخرج ؟ ينفع بس تفشخ نفسك في الايلتس

4- ينفع اخد اقامه استراليا واروح بيها نيوزيلاندا ؟ ينفع طبعا وتشتغل بيها كمان

5- لازم اروح استراليا فورا بعد ما خدت الفيزا ؟؟ لازم تروح في خلال سنه من حصولك عليها

6- المدة اللي اخدها عشان اهاجر قد ايه ؟؟ لو كل حاجه جاهزة تاخد 6 شهور .. لو مش جاهزة تاخد سنه ونص او سنتين